{$lang.login}{$lang.site_name}
Welcome
Login / Register

Most popular


  • የሰዶምና የገሞራ ሰዎች ተግባር በዘመናችን

    ዓለማችን ለከንቱ ነገር የምትሮጥበት ጉዳይ እየበዛ መጥቷል፡፡ የአንዳንዶቹ ሩጫዎች ደግሞ ጭፍንና እግዚአብሔርን ያልተመረኮዙ በመሆናቸው የገዛ አእምሮን ለማይረባ ነገር አሳልፈው እየሰጡ ይገኛሉ፡፡ ኀጢአት በዓለም ነግሦ ፣ ክፋት እንደ ቅድስና ተቆጥሮ እየተዘወተረ ነው፡፡ በጨለማ ሥራ ከማፈር ይልቅ የሚመኩ ሰዎች ማየት ከጀመርን ሰነበትን፡፡ እያደር ጆሮ አይሰማው የለ! ብዙዎች በገሀድ ለዝሙት ሽር ጉድ ከማለት አልፈው ራሳቸውን የሰዶም ማኅበርተኛ አድርገው መብታችን ተረገጠ ማለት ጀምረዋል፡፡

     ሐዋርያው “እንዲሁም ወንዶች ደግሞ ለባሕርያቸው የሚገባውን ሴቶችን መገናኘት ትተው እርስ በርሳቸው በፍትወታቸው ተቃጠሉ፤ ወንዶችም በወንዶች ነውር አድርገው በስሕተታቸው የሚገባውን ብድራት በራሳቸው ተቀበሉ። እግዚአብሔርን ለማወቅ ባልወደዱት መጠን እግዚአብሔር የማይገባውን ያደርጉ ዘንድ ለማይረባ አእምሮ አሳልፎ ሰጣቸው፤” (ሮሜ ፩፥ ፯ - ፳፰) ሲል የተናገረው ቃል እየተፈጸመባቸው ይገኛል፡፡ ለዚህ ጽሑፍ መነሻ የሆነን በቀኖና ቤተ ክርስቲያን ገሞራውያን በሚል የሚጠሩት የግብረ ሰዶም ጉዳይ ነው፡፡

    ሰዶምና ገሞራ በዮርዳኖስ ሸለቆ ተቆርቁረው የነበሩ ከተሞች ሲሆኑ አብርሃምና ሎጥ በአገልጋዮቻቸው ምክንያት ተለያይተው ለመኖር ሲወስኑ ሎጥ የሰዶምን ከተማ በመምረጥ ኑሮውን መሥርቶ ነበር፡፡ (ዘፍ ፲፫)፡፡ በሰዶምና በገሞራ ይኖሩ የነበሩ ሰዎች ግን በዝሙት ሥራ የታወቁ ነበሩ፡፡ ከተፈጥሮ ሥርዐት ውጭ በሆነ መንገድ ወንድ ከወንድ ጋር በመገናኘት ከዝሙት የከፋ ተግባርን ስለሚያከናውኑ ለግብረ ሰዶም ስያሜ መነሻ ሆኑ፡፡ በረከሰ ሥራቸው ምክንያት እግዚአብሔር በዲን እሳት አጥፍቷቸዋል፡፡ (ዘፍ. ፲፰፥፳ ፤ ፲፱፥፳፬)

     ግብረ ሰዶም ሲባል የቃሉ ትርጓሜ እንደሚነግረን የሰዶም ሰዎች የሥራ ውጤት ማለት ነው፡፡ ቅዱስ ጳውሎስ በ፩ኛ ቆሮንቶስ መልእክቱ ምዕ. ፮ ቁጥር ፱ ላይ ግብረ ሰዶማውያንን ቀላጮች እያለ ይጠራቸዋል፡፡ ወንድ አገረድ፣ ለጾታው የማይገባውን ዝሙትን ለመፈጸም እንደ ሴት ሆኖ ከወንድ ዘርን ሲቀበል፤ እንዲሁም ሴት ከወንዳወንድ ሴት ጋር ዝሙትን ስትፈጽም ቀላጭ ትባላለች፡፡ በእንግሊዝኛው ቋንቋ ወንድና ሴት ግብረ ሰዶማውያን የተለያየ ስያሜ አላቸው፡፡ ወንድ ግብረ ሰዶማውያን GAY የሚባሉ ሲሆን ሴት ግብረ ሰዶማውያን ደግሞ LESBIAN ተብለው ይጠራሉ፡፡

     በብሉይ ኪዳን ዘመን በአሕዛብ ዘንድ በጣዖት የአምልኮ ሥርዐት ውስጥ ልቅ ዝሙትና ሰዶማዊ ግብረ አምልኮ ይፈጸም ነበር፡፡ በሙሴ ሕግ መሠረት ይህን የረከሰ ተግባር የሚፈጽሙ ሁሉ ይገደሉ ነበር፡፡ (ዘሌ. ፳፥፲፫)፡፡ ምክንያቱም ወንድ ከወንድ (ተባዕት አምሣያ ፈቃደ ሥጋ) ሴትም ከሴት ጋር (አንስት አምሣያ ፈቃደ ሥጋ) የሚፈጽም ማንኛውም ዓይነት ሩካቤ ሥጋ አጸያፊ በመሆኑ ነው፡፡ (ዘዳ. ፳፫፥፲፯፣ ፩ኛ ነገ. ፲፬፥ ፳፬፤ ፲፭፥፲፪፣ ፳፪፥፵፮)

     ግብረ ሰዶማዊነት የተጠቀሰውን ዓይነት ቅጣት ቢያስከትልም ሰዎች ግን ከድርጊቱ ሳይቆጠቡ ዛሬ ድረስ እየፈጸሙት ይገኛሉ፡፡ ነውርነቱ እንደመልካም ግብር ተቆጥሮ በዐራቱም መአዝነ ዓለም እየተተገበረ ነው፡፡ በተለይ ምዕራባውያንና አሜሪካውያን እየደገፉት መምጣታቸው በመአዝነ ዓለም ለመስፋፋት ምቹ አጋጣሚ ሆኖል፡፡ እነዚህ ሀገራት ከ1980 አጋማሽ ጀምረው በምሥጢርና በድብቅ መፈጸሙን ትተው በሥልጣኔ ሰበብ ወደ አደባባይ አውጥተውታል፡፡ ከራሳቸው ሀገር አልፈው በሌሎች ሀገራት ላይ ጫና በማሳደር ግብረ ሰዶም እንዲስፋፋም እየጣሩ ነው፡፡

     ለምሳሌ፡- አሜሪካ ለሌሎች ተቋማትም ሆነ ሀገራት በምትሰጠው ርዳታ ውስጥ ለግብረ ሰዶማውያን የሚደረገውን መብት ግምት ውስጥ አስገብታለች፡፡ ከሰው ልጆች የመብት ጥያቄዎች እንደ አንዱ ቆጥራዋለች፡፡ “Same have suggested that gay rights and human rights are separate and distinct,” Mrs, Clinton Said at the united Nations Human rights councils in Geneva, “but in fact they are one and the same” (www.nytimes.com)

     ብዙ ሀገራት ግን ግብረ ሰዶምን በመቃወም እያወገዙት ነው፡፡ ሀገራችን ኢትዮጵያም ሀገረ እግዚአብሔር እንደመሆኗ መጠን ግብረ ሰዶም ኃጢአት መሆኑን በሃይማኖት አባቶች በኩል እየሰበከች ነው፡፡ ህዝቦቿም በከፍተኛ ሁኔታ ግብረ ሰዶምን ይቃወማሉ፡፡ መቀመጫውን ዋሽንግተን ዲሲ ያደረገው “Pew Research Center” እ.አ.ኤ በ2007 በሰበሰበው ዓለም አቀፍ የአመለካከት ቅኝት /Global Attitudes Survey/ 97 በመቶ ኢትዮጵያውያን ግብረ ሰዶምን እንደሚቃወሙ ነው፡፡ (http://www.pewglobal.org) በአንጻሩ ግብረ ሰዶምን ለማስፋፋት የሚሯሯጡ ጥቂት አካላትም ቢሆኑ በሀገራችን ብቅ ማለት ጀምረዋል፡፡

     በሀገራቸን ኢትዮጵያ ግብረ ሰዶም ለማስፋፋት ላይ ታች በማለት ከሚደክሙት መካከል ከውጭ ሀገር የሚመጡ የውጭ ዜጎችና ለረዥም ዓመታት በውጭ ሀገር ኖረው ይህን ተግባር የተለማመዱ ሰዎች ይጠቀሳሉ፡፡ እንደሌላው ሀገር በአደባባይ “I am a Gay” ብለው የሚፎክሩ ባይኖሩም በስብሰባ አዳራሽ ግን መታየት ጀምረዋል፡፡ ራሳቸውን ደብቀው ውስጥ ውስጡን መስፋፋታቸው የዐደባባይ ምሥጢር ሆኗል፡፡ በውጭ ሀገር የሚገኙ ግብረ ሰዶማውያን በሀገራችን የሚገኙ ጥቂት ግብረ ሰዶማውያንን ለ”መብታቸው” ሰልፍ እንዲወጡና በሕግ እዲፈቀድ እየቀሰቀሱ ይገኛሉ፡፡ የትምህርት ተቋማትንም ከመዳረሻቸው እንደ አንዱ አድርገዋቸዋል፡፡

     በትምህርት ቤቶች ወጣቶችን በማለማመድና በመመልመል ግብረ ሰዶምን ለማስፋፋት የሚንቀሳቀሱ መኖራቸውን የሚጠቁሙ መረጃዎች አሉ፡፡ (ግብረ ሰዶማዊነት በዩናይትድ ፎር ላይፍ ኢትዮጵያ ገጽ ፵፰) እኒህ ሰዎች ለክፉ ለሥራቸው ይረዳቸው ዘንድ የመገናኛ መሥመር ዘርግተው ትውልዱን በረከሰው ተግባራቸው እየበረዙት ይገኛሉ፡፡

     ይህ የሚያሳየው ዓለማችን የሰዶምን ሥራ ከምንጊዜውም በላይ ለመቀበል የተዘጋጀች መሆኗንና ሥነ ምግባር እየመነመነ መምጣቱን ነው፡፡ ጸሐፍት እንደሚናገሩት በሐሳዌ መሢህ ዘመን ከሚፈጸሙ ሰባት ዋና ዋና ኃጢአቶች መካከል ግብረ ሰዶም አንዱ እንደሆነ ነው፡፡ (ኆኅተ ሃይማኖት ከመምህር ብርሃኑ ጎበና ገጽ ፻፲፪)

     የግብረ ሰዶምና የዓለማችን አነዋወር እንዲህ ከሆነ፤ ይህን ሰይጣናዊ ግብር ወይም የኃጢአቶች ሁሉ አውራ የሆነውን ግብረ ሰዶም ለመከላከል ወይም እንዳይስፋፋ ለማድረግ ከኦርቶዶክሳውያን ተማሪዎችና ከግቢ ጉባኤያት ማከናወን የሚጠበቁ ተግባራትን እንመልከት፡፡ ተማሪዎች፡-

     ፩. የክፉ መንፈስ ውጤት እንደሆነ መረዳት

     ግብረ ሰዶማውያን ድርጊቱን “የሥነ ፍጥረት ልዩ መገለጫ ነው” በማለት ለመስበክ ይሞክራሉ፡፡ “የሥነ ፍጥረት ልዩ መገለጫን” ለማጎልበት ግብረ ሰዶማዊ እንዲሆኑ ተደርገው እንደተወለዱ ይናገራሉ፡፡ ባሕርያቸው ወይም ዘረመል ለግብረ ሰዶም የተመቸ እንደሆነም አሳብ ይሰጣሉ፡፡ ይህ ግን ፈጽሞ የተሳሳተ አሳብ ነው፡፡ ምክንያቱም እግዚአብሔር የሰውን ልጅ ሲፈጥር በዚህ ሒደት ውስጥ እንዲያልፉ አድርጎ አይደለምና፡፡ (ዘፍ ፪፥፳፯)፡፡ ግብረ ሰዶማዊነት የተፈጥሮ ጉዳይ ቢሆን ኖሮ እግዚአብሔር ወንድና ሴት አድርጎ ባልፈጠረ ነበር፡፡ እግዚአብሔር ወንድን ለሴት፣ ሴትን ለወንድ ፈጠረ፡፡ በዚህም ሰዎች ከዝሙት ሥራ ይጠበቁበታል፡፡ (፩ኛ ቆሮ ፯፥፪)፡፡

     እግዚአብሔር በተመሳሳይ ጾታ መካከል ተፈጥሮአዊ መሳሳብን አላኖረም፡፡ ያ ቢሆን ኖሮ ለአዳም የምትመቸውን ረዳት ሆና ሔዋን ባልተፈጠረች፤ ሌሎች ፍጥረታት በሙሉ ወንድና ሴት ባልሆኑ ነበር፡፡ ይህ የተቀደሰ የእግዚአብሔር ሥራ ይከናወን ዘንድ አንድ ወንድ ከአንዲት ሴት ጋር መገናኘት አለባቸው፡፡ የትዳር ዓላማዎችም ዘር ለመተካት፣ ለመረዳዳትና ከዝሙት ለመጠበቅ ስለሆነ ግብረ ሰዶም በተመሳሳይ ጾታ ውስጥ ቦታ የለውም፡፡

     አንድም ሰው በባሕሪው ግብረ ሰዶማዊ ሆኖ ተፈጠረ ልንለው አንችልም፡፡ ይልቁንም በብርቱ የኀጢአት ልምምድ የተከሰተ ነው፡፡ ተግባሩ ቀስ በቀስ ወይም በመለማመድ ሰውን የሚጸናወት የክፉ መንፈስ ውጤት እንጂ ተፈጥሯአዊ ጉዳይ አይደለም፡፡ “ሳይንስ፡- የግብረ ሰዶማዊነት ስሜትና ባሕርይ መነሻ የማኅበራዊ ሕይወትና የአካባቢ ተፅዕኖ ውጤት ወይም አዲስ ነገር ለማድረግ የሚሹ ሰዎች ልምምድ እንጂ በፍፁም ተፈጥሮ ወይም በጅን (በዘረመል) ውስጥ ያለ ነገር አይደለም ይላል” (ግብረ ሰዶማዊነት በዩናይትድ ፎር ላይፍ ኢትዮጵያ ገጽ ፳፮)፡፡ ይህ ሰዎች ከመንፈሳዊ ተግባር በራቁ ቁጥር ወደዚህ ክፉ ድርጊት የሚመራ ክፉ መንፈስ ያገኛቸዋል፡፡ ስለሆነም ተማሪዎች ሁል ጊዜ ራሳቸውን ከተቀደሰው ከእግዚአብሔር ቤት ማኖር ይጠበቅባቸዋል፡፡

     ፪. የጤና ጠንቅ መሆኑን መገንዘብ

     ግብረ ሰዶማውያን ወፈፌነት፣ ስሜታዊነት፣ ባይተዋርነት፣ ያጠቃቸዋል፤ አእምሮታዊና አካላዊ ጤናቸው ይቃወሳል፡፡ ለዚህ ነው በኢትዮጵያ ኦርቶዶክስ ተዋሕዶ ቤተ ክርስቲያን በሊቃውንት ጉባኤ “ከሰዶማውያን ርኩሰት ተጠበቁ” በሚል ርእስ የተዘጋጀው መጸሐፍ “አእምሮታዊው እብደት ሲሆን አካላዊው በሽታ ደግሞ ኤድስ፤ የፊንጢጣና የአንጀት መቁሰል እንደሆነ የሕክምና ባለሞያዎች ያረጋገጡት ጉዳይ ነው” በማለት ለይቶ ያስቀመጠው፡፡ (ከሰዶማውያን ርኩሰት ተጠበቁ ገጽ ፵፩)
    በግብረ ሰዶማዊነት ምክንያት ሰዶማውያን በሆኑ ሰዎች ላይ ስለሚከሰቱ በሽታዎች ደግሞ በመለከት መጽሔት የተዘረዘሩት እንዲህ ይነበባሉ፡፡ “፩. የፊጢጣ ነቀርሳ (ካንሰር)፣ ፪. የአንጀት ነቀርሳ (ካንሰር)፣ ፫. ፌስቱላ፣ ፬. ኪንታሮት፣ ፭. የጡት ነቀርሳ (ካንሰር)፣ ፮. የጉሮሮ ቂጥኝ፣ ፯. የፊንጢጣ ቂጢኝ፣ ፰. መኻንነት፣ ፱. ኤች.አይ.ቪ ኤድስና ራስን ማጥፋት ዋና ዋናዎቹ ናቸው፡፡

     ከላይ ከተጠቀሱት ሌላ ግብረ ሰዶማውያን ከሚያጋጥሟቸው ችግሮች መካከል የዘር ሐረግ መቋረጥ (ስለማይወልዱ) የዕድሜ ማጠር (ግብረ ሰዶማዊነት ከ፲ እስከ ፴ ዕድሜ ይቀንሳል) ይህ ግብር በተፈጥሮ ከተፈቀደው ሥርዓት ውጭ የሚፈጸም በመሆኑ መቀመጫቸው (ፊንጢጣቸው) የላላ ነው፤ በዚህም ምክንያት ሰገራቸውን መቆጣጠር አይቻላቸውም፡፡ ለዚህም መከላከያ እንዲሆናቸው በማሰብ እንደ ሕፃን ልጅ በየሰዓቱ የሚቀያየር ዳይፐር (ላስቲክ) ለመጠቀም ይገደዳሉ” (መለከት መጽሔት ፳ኛ ዓመት ቁጥር ፪ ገጽ ፳፱)

     ከተመለከትናቸው በሽታዎች በተጨማሪ ይህን ተግባር ልምድ ያደረጉ ሰዎች ወደ ቅዱስ ጋብቻ አይገቡም፡፡ ወደ ትዳር ሕይወት ቢገቡ እንኳ ያለፈ ሕይወታቸው ቤተሰባዊ ሕይወታቸው ላይ ጭንቀት ይፈጥርባቸዋል፡፡ ዩናይትድ ፎር ላይፍ ኢትዮጵያ በበኩሉ “My Genes Made Me Do It” በሚል ርእስ ኤን ኢ ዋይት ሄድ በተባሉ ተመራማሪ ከተዘጋጀ መጽሐፍ ጠቅሶ፣ ግብረ ሰዶም ስለሚያስከትለው የማኅበራዊ ቀውስ ሲያትት “ራስን የማጥፋት፣ ግራ የመጋባት፣ የባሕርይ ተለዋዋጭነት፣ ማኅበራዊ ሕይወትን የመፃረርና የመሳሰሉት ብዙ ችግሮች በግብረ ሰዶማውያን ዘንድ እንዳሉ እናያለን” ብሏል፡፡ (ግብረ ሰዶማዊነት በዩናይትድ ፎር ላይፍ ኢትዮጵያ ገጽ ፲፱)

     አባቶቻችንም ሰዎች በክፉ ሥራቸው ጤናቸውን እንደሚያጡ ይናገራሉ፡፡ “በአሁኑ ጊዜ ጌታ እግዚአብሔር ኤድስን በሚያህል ክፉ ደዌ ዓለምን እያስጠነቀቀ ነው፡፡ ማስጠንቀቂያውም ሥጋቸውን ግብረ ሰዶማዊነትን ለመሰለ ለርኩሰት ለሰጡ ወጎኖች ነው” (ግብረ ሰዶማዊነት እና የሴቶች ክህነት በቤተ ክርስቲያን ዕይታ ገጽ ፲፪)፡፡ መረጃዎች እንደሚጠቁሙት ኤች.አይ.ቪ ከሚተላለፍባቸው መንገዶች መካከል በተቃራኒ ጾታዎች ፳፯ % በሚደረግ ወሲብ ሲሆን ፷፩ % ግን በግብረ ሰዶማውያን ነው፡፡ (መለከት መጽሔት ፳ኛ ዓመት ቁጥር ፪ ገጽ ፳፱) ግብረ ሰዶማውያን በሱሶች የተያዙ ናቸው፡፡ በሱሶች የተያዙ ሰዎች ደግሞ በአብዛኛው ለትምህርት ያላቸው ፍላጎት እምብዛም ነው፣ በትምህርት ገበታቸውም ፍሬ አልባ ናቸው፡፡

     ፫. ራስን ከኅቡዕ ድርጅት መጠበቅ

     ግብረ ሰዶማውያን በሚፈጽሙት ድርጊታቸው ለየት ያለ ጠባይ ይታይባቸዋል፡፡ በአለባበሳቸው ሁል ጊዜ ቁምጣ ሱሪ ማዘውተር፣ “ስኪኒ” በመባል የሚጠራውን ጠባብ ሱሪ እና እምብርታቸውን የሚያሳዩ “ቦዲ ቲሸርት” መልበስ፣ ጫማ ያለ ካልሲ ማድረግ፣ ጆሯቸውን በተለያየ ቦታ በመበሳት ጌጣ ጌጥ ማስገባት፣ ሎቲ ማንጠልጠልን ያዘወትራሉ፡፡

     ይህ በግልጽ የሚታየው አካሄዳቸው ሲሆን በግልጽ ሊሄዱባቸው የሚችሉባቸው መንገዶች የተዘጉ ከመሰሏቸው ሌሎች መንገዶችን በመጠቀም ሰውን ወደ እነርሱ ማኅበር ሊስቡ ይሞክራሉ፡፡ በኢንተርኔት፣ በፌስ ቡክ፣ ውስጥ ለውስጥ በሚደራጁ ቡድኖችና በውጭ ሀገራት የእነርሱ አባል በመሆን በሚገኝ ጥገኝነትና የውጭ ሀገር ዕድሎችን ማመቻቸት፣ ሆነ ተብሎ ግብረ ሰዶምን ለማስፋፋት የሚዘጋጁና በከፍተኛ ሁኔታ ባህልንና ሥነ ልቡናን የሚጎዱ ፊልሞችን፣ ዘፈኖችን፣ የኅትመት ውጤቶችን አዘጋጅቶ ተግባራቸውን ማስፋፋት ተጠቃሽ መንገዶች ናቸው፡፡ በዚህ መንገድ የምናደርጋቸው ግንኙነቶችን ቆም ብሎ መመርመር ተገቢ ነው፡፡

     ሌላው ሰውን ወደ እነርሱ ማኅበር አስገድደው በመድፈር ወይም በመደለል ይቀላቅላሉ፡፡ አንዳንዶች ባለማወቅ በእነዚህ ሰዎች የተደፈሩበት አጋጣሚዎች መኖራቸውን ጠቋሚዎች አልጠፉም፡፡ በተለይ ሕፃናትን በመደለል የጥቃታቸው ሰለባ አድርጎቸዋል፡፡ ወጣቶችንም ቢሆን በግዳጃ ከመድፈር አልተመለሱም፡፡ “… የተለያዩ ጥናቶች እንዳመለከቱት በዚህ ሕይወት ያሉ ብዙዎች በልጅነታቸው በተለያዩ ግለሰቦች ወሲባዊ ጥቃት ደርሶባቸዋል፡፡ አንዳንዶች ከቅርብ ዘመድ ጥቃቱ ሲደርስባቸው ሌሎች በጎረቤት፣ በጓደኞች ወ.ዘ.ተ ተጠቅተዋል፡፡ ወንድ ልጅ በግብረ ሰዶማዊ ከተደፈረ ብዙውን ጊዜ ሰዶማዊ የመሆን አዝማሚያው ከፍ ያለ ነው፡፡ እርሱ እንደተጠቃ ሌሎችን ለማጥቃት ይፈልጋል፡፡ … እንዲሁም ሴት ልጅ በለጋነት ዕድሜዋ በወንድ ከተደፈረች ድርጊቱ በጣም ስለሚጎዳት የወንድን ወሲባዊ ስሜት ማርኪያ መንገድ ይጠፋባታል፡፡ ስለዚህ እንደ አማራጭ ተመሳሳይ ፆታ ወዳላት ሴት ጋር ትሄዳለች፡፡ ከዚህ የተነሣ ግብረ ሰዶማዊ ልምድ ታዳብራለች” (ግብረ ሰዶማዊነት በዩናይትድ ፎር ላይፍ ኢትዮጵያ ገጽ ፳፩)

     ዛሬ ዛሬ በመዝናኛ ቦታዎች እነዚህ አካላት ብቅ ማለት ጀምረዋል፡፡ የጨለማ ሥራቸው እስኪገለጥ ድረስ ራሳቸውን እንደጥሩ ሰው በማቅረብ እና ወጣቶችን በመተዋወቅ የጨለማ ሥራቸውን ይሠራሉ፡፡ በመሆኑም ውሎንና ጓደኛን በትኩረት መመርመር መለየት ከሚገባበት ደረጃ ላይ ደርሰናል፡፡

     ፬. በቅዱሳት መጻሕፍት ስም እንዳያስቱን መጠንቀቅ

     “ሌባ ላመሉ ዳቦ ይልሳል” እንዲሉ ግብረ ሰዶማውያን ደጋፊ ሲያጡ ተግባራቸውን በመጽሐፍ ቅዱስ ለማስደገፍ ይሞክራሉ፡፡ ከእግዚአብሔር ሰዎችም ጋር ለማስተሳሰር ጥረት ሲያደርጉ ይታያሉ፡፡ “ወንድሜ ዮናታን ሆይ፥ እኔ ስለ አንተ እጨነቃለሁ በእኔ ዘንድ ውድህ እጅግ የተለየ ነበረ፤ ከሴት ፍቅር ይልቅ ፍቅርህ ለእኔ ግሩም ነበረ” (፪ኛ ሳሙ. ፩፥፳፮) በማለት ንጉሥ ዳዊት ስለዮናታን የተናገረውን የሙሾ ቃል በመውሰድ ግብረ ሰዶማዊነት የተፈቀደ ተግባር እንደሆነ አድርገው ያወራሉ፡፡ በእነሱ አተያይ ተግባራቸው ሰውን የመውደድ ምልክት ነው፡፡

     ቅዱስ ዳዊት “ከሴት ፍቅር ይልቅ ፍቅርህ ለእኔ ግሩም ነበረ” ሲል ከዮናታን ጋር ስለነበረው ጥብቅ መተሳሰርና የወዳጅነት ፍቅር ለመግለጽ ነው እንጂ የክፉ ሥራ ተባባሪ ሆኖ አይደለም፡፡ ንጉሥ ዳዊት እግዚአብሔር እንደልቤ የሆነ በማለት የተናገረለት ሰው ነው፡፡ በእግዚብሔር ዘንድ ሞገስ ያለው ሰው ነው፡፡ ሴቶችን አግብቶ ልጆችን እንደወለደ፤ ዮናታንም ልጅ እንደነበረው መጽሐፍ ቅዱስ ይነግረናል፡፡ (፩ኛ ሳሙ. ፳፭፥፵፫፣ ፪ኛ ሳሙ ፱፥፩)

     በመሆኑም ግብረ ሰዶማዊያን ቅዱስ ጴጥሮስ “በእነዚያ ዘንድ ለማስተዋል የሚያስቸግር ነገር አለ፥ ያልተማሩትና የማይጸኑትም ሰዎች ሌሎችን መጻሕፍት እንደሚያጣምሙ እነዚህን ደግሞ ለገዛ ጥፋታቸው ያጣምማሉ።” (፪ኛ ጴጥ. ፫፥፲፮) እንዳለ ሰውን ለማሳት የመጻሕፍት ቃል ለመጥቀስ ይሞክራሉ፡፡ ግብረ ሰዶማዊነት በሥጋ ፈቃድ ላይ የተመሠረተ እንጂ የፍቅር መገለጫ አይደለም፡፡ በሥጋ ፍላጎት እና በፍቅር መካከል ከፍተኛ ልዩነት አለ፡፡ ለግብረ ሰዶም ፍቅር የሚለው ቃል ፈጽሞ አይስማማውም፡፡ ሰው የሚወድ ሰው እንዴት ወንድሙን በረከሰ ተግባር ያጠፋዋል? ለዘለዓለም ቅጣትስ እንዴት ይዳርገዋል? ምክንያቱም የሰዶም ሥራ ለሰዶማውያን አልጠቀመምና፡፡

     ግብረ ሰዶም የሰዶምንና የገሞራን ሰዎች በዲን እሳት አጥፍቶ ዕፀዋትና እንስሳት የማይኖሩበት፣ ዓሦች የማይርመሰመሱበትን የጨው ባሕርን የፈጠረ የኀጢአት ውጤት ነው፡፡ ይህ ባሕር እስከዛሬ ድረስ ለሰው ልጆች የማስተማሪያ ምልክት ይሆን ዘንድ በውስጡ ሕይወት ያለው ነገር እንኳ አይታይበትም፡፡ በዓለም ካርታ ላይም “የሙት ባሕር” የሚል መጠሪያ ተሰጥቷታል፡፡ ይህን ድርጊት የሚፈጽሙ ሰዎች በሰዶምና ገሞራ ከደረሰው ጥፋት ውጭ የሚያተርፉት አንዳች ነገር የለም፡፡

     በረከሰ ተግባር የሚኖሩ ሰዎች የረከሰውን ተግባራቸውን ካልተው በቀር ወደ እግዚአብሔር መንግሥት አይገቡም፡፡ አመንዝሮችና ሰዶማውያን ከእግዚአብሔር መንግሥት ዕድል ፈንታ የላቸውም፡፡ በሐዲስ ኪዳን በሰዶማውያን ላይ እንደ ብሉይ ኪዳን የሥጋ ሞት ቅጣት ባይበየንም፣ በአፀደ ነፍስ ግን ዘለዓለማዊ ሞት እንደሚጠብቃቸው ተጽፏል፡፡ (ዘሌ. ፳፥፲፫፣ ፩ኛ ቆሮ. ፮፥፱) የቤተ ክርስቲያን ቀኖና በበኩሉ ወደዚህ ተግባር በገቡ ሰዎች ላይ የሞት ፍርድ ያዛል፡፡ “ግብረ ሰዶም የሚሠሩ ሰዎች ለአድራጊውና ለተደራጊው ቅጣት ሰይፍ ነው፡፡ ተደራጊው ከዐሥራ ሁለት ዓመት ያልሞላው ቢሆን የዘመኑ ማነስ ከቅጣት ያድነዋል” (ፍትሐ ነገሥት አን. ፵፰)፡፡ በመሆኑም ለሰዶማውያን ያላቸው ብቸኛ አማራጭ ወይም መብት ሕይወታቸውን ወደ ንስሓ መመለስ ነው፡፡ “ሰዶማውያንና ሰዶማውያት ሁሉ ከዚህ አስነዋሪና አስጸያፊ ተግባር በንስሓ እንዲመለሱና ከአእምሮዊና አካላዊ በሽታ እንዲፈወሱ፣ ከርኩሰታቸው እንዲቀደሱ ቤተ ክርስቲያን ትመክራለች፤ የማይመለሱትንና እንቢተኞችን ግን በጽኑዕ ታወግዛለች፣ ከአንድነትዋም ትለያለች” (ከሰዶማውያን ርኩሰት ተጠበቁ ገጽ ፵፩)

     ምእመናን ግብረ ሰዶም አስከፊ ተግባር መሆኑን አውቀው ለሁሉም በመምከርና በማስተማር፣ የችግሩ ተጠቂም እንዳይሆኑና የድርሻቸውን ሊወጡ ይገባቸዋል፡፡ ይህን ችግር ከመቅረፍ አንጻር ለተማሪዎች ቅዱሳት መጻሕፍትን በመመልከት ማሳሰብ፣ በጤና ላይ የሚያስከትለውን ችግር፣ ባህልንና ማኅበራዊ ሕይወትን እንደሚጎዳ ማስተማር፣ የምክክር መድረክ በማዘጋጀት የችግሩን አሳሳቢነት ማስረዳት፤ በተግባሩ የተጠቁትን ደግሞ በቶሎ ወደ ንስሓ እንዲመጡ መርዳት ግብረ ሰዶም እንዳይስፋፋ ያግዛል፡፡
    በቤተ ክርስቲያን ታሪክ እንደምንመለከተው በሕገ እግዚአብሔር ከመኖራቸው በፊት አመንዝሮች የነበሩ፡፡ ኋላም በንስሓ ተመልሰው ለክብር የበቁ ብዙ ቅዱሳን አሉ፡፡ ስለዚህ የሰው ልጆች ሁሉ በንስሓ ሕይወታቸውን ማስተካከል እንደሚችሉ ቅዱሳት መጻሕፍትን በመጥቀስ ማስገንዘብ ያስፈልጋል፡፡

     በእርግጥ ሰዎች በኀጢአት ወጥመድ ሲያዙ ጸጋ እግዚአብሔር ስለሚርቃቸውና ኅሊናቸው ስለሚቆሽሽባቸው ድርጊቶቻቸውን ለመመዘን ይከብደቸዋል፡፡ ኀጢአቱ ጽድቅ፣ ጽድቁ ኀጢአት ይሆንባቸዋል፡፡ በመሆኑም ተመለሱ ሲባሉ እንደ ሰዶምና ገሞራ የማይገነዘቡ ይሆናሉ፡፡ በዚህን ጊዜ ሕይወታቸውን የሚያስተካክሉበትን መንገድ በነቀፌታ ሳይሆን ርኅራኄ በማሳየት ማስገንዘብ ከሁላችንም የሚጠበቅ ተግባር ነው፡፡
    ሓላፊነት የሚሰማቸው ሁሉ ሲመክሩና ሲያሰስተምሩ ለራሳቸው መጠንቀቅና አደገኛነቱን ግምት ውስጥ ማስገባት ተቀዳሚነት የሚሰጠው ጉዳይ ነው፡፡ አስቀድሞ ራስን መጠበቅ ያስፈልጋል፡፡ ምክንያቱም ሌሎችን ለመታደግ በሚያደርጉት ጥረት ውስጥ የችግሩ ሰለባ መሆን የለባቸውምና፡፡

     በአጠቃላይ የሰው ልጅ ክብሩ የመንፈስ ቅዱስ ማደሪያ በመሆን የሚገለጽ ነው፡፡ ሰው የእግዚአብሔር ትእዛዘ ሲያከብር በቅድስና ይኖራል፡፡ ቅዱስ ጳውሎስ እንደተናገረው ክርስቲያን ሰውነቱ የመንፈስ ቅዱስ ማደሪያ ነውና፡፡ (፩ኛ ቆሮ ፮፥፲፱)፡፡ ነገር ግን በርኩስ ሥራ ሰውነታችንን ስናሳድፈው መንፈሰ እግዚአብሔር ይርቀናል፡፡ ከእግዚአብሔር መንግሥትም እንለያለን፡፡ ከእግዚአብሔር መንግሥት ከሚለዩ የክፋት ሥራዎች አንዱና ዋነኛው ግብረ ሰዶም ነው፡፡ በመሆኑም ግብረ ሰዶም እንዳይስፋፋና ሀገረ እግዚአብሔር የሆነችውን ሀገራችንን እንዳይበክል የበኩላችንን አስተዋጽኦ እንናበርክት፡፡

     ክቡራን አንባብያን ስለ ግብረ ሰዶም ምን ትላላችሁ? ከእያንዳንዱ ሰው የሚጠበቀው ተግባርና ኃላፊነት ምን ይሁን? ጥያቄ አስተያየት ካላችሁ www Eotc mk.org ላኩልን እናስተናግዳለን፡

    ምንጭ ጉባኤ ቃና 2006 ዓ.ም.

    Read more »

  • አላዋቂ ሳሚ . .

    ታኅሣሥ 22 ቀን 2007 ዓ.ም.

    “ጉድ ሳይሰማ መስከረም አይጠባም” ይላሉ አበው፡፡ መረጃ ከአንዱ የዓለም ጫፍ ወደ ሌላው ከመቅጽበት በሚዛመትበት በዚህ ዘመን፤ ላይከፈት የተከደነ፤ ላይታይ የተሸፈነ ምሥጢር የለም፡፡ ሰሞኑን ከወደ አሜሪካ የሰማነው ወሬ ለዚህ አጭር ጽሑፍ መነሻ ሆኗል፡፡

     

    ወይዘሪት ዌንዲ ቤልሻር ትባላለች፣ አማሪካዊት ናት፤ ሞያዋ የአጻጻፍ ብልሃትን ማስተማር ነው፤ የሥነ ጽሑፍ ባለሞያ ናት ማለት ነው፡፡ በዚሁ ሞያዋ እንጀራዋን ስታበስል ቆይታ፤ በስተመጨረሻ ከግእዝ ቋንቋ ጋር ትተዋወቃለች፤ በምታስተምርበት ፕሪንስተን ዩኒቨርሲቲ በሚገኙ አንድ ግእዝ ዐዋቂ ኢትዮጵያዊ ሊቅ አማካኝነት ፊደላችንን ለማንበብ መቁጠር ጀመረች፡፡ ከእንግሊዝኛ ፊደላት በተጨማሪ አዲስ ጥንታዊ ፊደል በማወቋ፤ ከዚያም አልፎ ለማንበብ ፊደላቱን መቁጠር በመቻሏ ተደሰተች፤ ግእዝ አወቅኩ አለች፤ አስተምራለሁም በማለት ተነሣች፡፡

     

    በሂደትም መጻሕፍትን ልተርጉም ብላ ተነሣች፤ ገድለ ወለተ ጴጥሮስ ከእጇ ገባ፤ ብታገላብጠው አልሆነም፡፡ መጽሐፉ እንደ ዓለት ጠጠረባት፤ አሉ የተባሉትን የግእዝ እንግሊዝኛ መዝገበ ቃላትን በመሰብሰብ ጠረጴዛዋ ላይ ደረደረች፤ ትርጉሙ ግን ሊሆን አልቻለም፡፡ “የጐበዝ ያለህ” ብላ ተጣራች፡፡ ሚካኤል ክላይነር የተባለ የግእዝ ዕውቀቱ ከእሷ የተሻለ ጀርመናዊ “አቤት፤ አለሁ፤ ምን ልታዘዝ” በማለት መልስ ሰጣት፡፡ የገጠማትን ችግር አማከረችው እና ምን ማድረግ እንዳለባቸው ተወያዩ፡፡ ጀርመን ሀገር ሆኖ ገድሉን ወደ እንግሊዝኛ ሊተረጉምላት፣ እሷም ለአምስት ዓመታት የወር ደመወዝ ልትቆርጥለት ተፈራ ረሙ፡፡ በስምምነቱ መሠረት ሚካኤል ክላይነር በመጽሐፉ ኅትመት ስሙ የማይጠቀስ ከመጋረጃ ጀርባ ያለ /shadow written/ መሆኑ ነው፡፡ እሱ ተርጉሞ ሲጨርስ መግቢያና ማውጫ ጽፋለት በስሟ ታሳትማለች፡፡ ከወር ባነሰ ጊዜ በሚብተው አዲሱ የእነሱ ዓመት መጀመሪያ አካባቢ “የትርጉም ሥራዋ” እንደሚታተም ባገኘችው አጋጣሚ ሁሉ በኩራት ላገኘችው ሁሉ በመግለጽ ላይ ትገኛለች፡፡

     

    ጉዱ እንዲህ ማድረጓ አይደለም፡፡ ይህች “የግእዝ ተማራማሪ” ሚካኤል ክላይነር ተርጉሞ ከሰጣት ንባብ አንዲት ዐረፍተ ነገር መዝዛ በማውጣት “በቅድስት ወለተ ጴጥሮስ ዘመን ያልተገባ የአንስት መነኮሶይያት ግንኙነት ነበር” ብላ ማንበብ የማትችለውን የግእዝ ንባብ በቀኝ እጇ፤ ሚካኤል ከጀርባዋ ተርጉሞ የሰጣትን እንግሊዝኛ ራስዋ ይዛ ብቅ አለች፡፡ ብቅ ብላም መድረኩን ላዘጋጀላት አካል ሁሉ መናገር ጀመረች፡፡ ይህን ጉድ የእኛ ቤተ ክህነት ሰማች፡፡ ወይ ድፍረት በማለት “የተሳሳተ ትርጉምሽንና ንግግርሽን አቁሚ፤ እስከ አሁን ባለማወቅ የሳትሽ የገደፍሽውንም አርሚ” በማለት ደብዳቤ ተጻፈላት፡፡ ወ/ሪት ዌንዲ ግን “እንዴት ተደርጐ” በማለት በስሕተት ጐዳናዋ አሁንም ቀጥላለች፡፡

     

    በመሠረቱ የግእዝ ቋንቋ መዐዛ ብዙዎችን መሳቡ፤ በቋንቋው ከረጢትነት የተቋጠረው ምሥጢር ሰፊ፤ ጥልቅና የደለበ ዕውቀት የያዘ በመሆኑ ቀልባቸውን መያዙ በእጅጉ ያስደስተናል፡፡ ዛሬ ዛሬ የግእዝ ቋንቋችንን ለመቀጸል የሚፈልጉ አፍርንጅ በዓለም ዙርያ እየተበራከቱ ማየት የተለመደ እየሆነ ነው፡፡ ይህ ግእዝን የማወቅ እንቅስቃሴ ዛሬ የተጀመረ አይደለም፡፡ በ፲፯ኛ መቶ ክፍለ ዘመን ከነበረው ኢዮብ ሉዶልፍ /እ.ኤ.አ ከ1624-1704 የኖረ/ ጀምሮ በወሬ ሲሰማ፤ በተግባርም ሲታይ የነበረ እውነታ ነው፡፡ ሉዶልፍ የግእዝን አገር እንኳን በእግሩ ሳይረግጥ እዚያው ባለበት ሀገረ ጀርመን ሆኖ አባ ጎርጎርዮስ ከተባሉ የመካነ ሥላሴ መነኩሴ ተምሮ ሰዋስውን በመጠንቀቅ ዛሬም ድረስ ሁሉም የሚናጠቀውን የግእዝ ሰዋስውና መዝገበ ቃላት ጽፏል፡፡ በዚህም የኢትዮጵያውያንን የግእዝ ሊቃውንት ክብርና ሞገስ አግኝቷል፡፡ ነገር ግን ከኢዮብ ሉዶልፍ ሥራ ጀርባ አውሮፓውያን ብዙም ያልዘመሩለት፤ እኛ ኢትዮጵያውያን ግን ልናውቀውና ልናዘክረው የሚገባ አንድ ኢትዮጵያዊ ባለቅኔ የግእዝ ዐዋቂ አባ ጎርጎርዮስ መኖሩ መታወቅ አለበት፡፡

     

    የሆነው ሆኖ የአባ ጎርጎርዮስ መኖር የኢዮብ ሉዶልፍን ክብር አይከፍለውም፡፡ ሊቅን በአግባቡ የመጠቀም ችሎታውን ያጐላዋል እንጂ፡፡ ጀርመናዊው ኦገስት ዲልማንም የግእዝ መጻሕፍትን በመመርመር የታወቀ ሊቅ ስለነበር “የግእዝን ሞያ እንደ እሱ የሚያውቅ የለም” ተብሎለታል፡፡

     

    ግእዝና የሰነቀው ዕውቀት በዓለም ዙርያ ያተረፈውን ዕውቀት በማስተዋልና በማሰብ የመደሰታችንን ያህል፤ እንደ ወይዘሪት ዌንዲ ዓይነት አላዋቂ ሳሚ መጥቶ የማይሆን ቆሻሻ ሊቀባው ሲገዳደር ስንመለከት እናዝናለን፡፡ እንደነ ሉዶልፍ ዓይነት የግእዝን ብልት አውቀው በመጠቀምና ሌሎችን በመጥቀም ያለፉና አሁንም ያሉ ቢኖሩም፤ እንደ ዌንዲ ዓይነት ደፋሮች ብቅ ብቅ ብለው እንዳለፉና ዛሬም እንዳሉ ጉዳዩን በቅርብ ለሚከታተል ሁሉ እንግዳ አይደ ለም፡፡ በዚህኛው ጐራ ብቅ ያሉትን ኩሸትና ድፍረት መዘርዘር “ከሰደበኝ ስድቤን የነገረኝ” እንደሚባለው ዓይነት ስለሚሆን ተገቢ አይደለም፡፡ በነገራችን ላይ በዚህኛው ጐራ የሚመደቡት አፍርንጅ ብቻ አይደሉም፡፡ በግእዝ አገር የተወለዱ፤ ነገር ግን ለግእዝ ባዕድ የሆኑ ኢትዮጵያውያንም እንዳሉ መታወቅ ይኖርበታል፡፡

     

    በግእዝና አምቆ በያዘው ዕውቀት ላይ የሚደረጉ ምርምሮች የሚቆሙ አይደሉም፤ ነገም ይቀጥላሉ፡፡ ቤተ ክህነታችን የምስጋናም ይሁን የወቀሳ ደብዳቤ ቢጽፍም፣ ባይጽፍም፤ የግእዝ ባለቤቶች ኢትዮጵያውያን ተደሰትንም አዘንም በየትኛውም መንገድና ችሎታ በቋንቋችንና በዕውቀታችን የሚደረገው ምርምርና ኩሸት ይቀጥላል፡፡ ዋናው ቁም ነገር በቋንቋችንና በዕውቀታችን ላይ በሚደረጉ ምርምሮች በማወቅም ይሁን ባለማወቅ የሚፈጠሩ ስሕተቶች እንዲቀንሱ፤ የቤተ ክርስቲያኒቱን ብሎም የሀገሪቱን ትክክለኛ ማንነት የሚገልጹ ግኝቶች እንዲበዙ ትውልድን የሚጠቅም ተግባር መፈጸም ነው፡፡

    በመሆኑም ከላይ የጠቀስነው እንዲፈጸም ሓላፊነቱ የተጣለብን አካላት ብንፈጽማቸው የምንላቸውን በአጭሩ እናቀርባለን፡፡
     
    1. ቤተ ክህነት
     
    የኢትዮጵያ ቤተ ክርስቲያንና ሊቃውንቷ መጠነ ሰፊ፤ ዘርፈ ብዙ የሆነ ውን ኢትዮጵያዊና ክርስቲያናዊ ዕውቀት በጽሑፍ መዝግበው፤ በመጠበቅ ለትውልድ እንዲቆይ በማድረጋቸው የማያመሰግን ቢኖር ዕውቀትን፣ ጥበብን እንዲሁም ፍልስፍናን የሚጠላ ነው፡፡ በሌላ አነጋገር ዕውቀትም ፍልስፍናም የሌለው ነው፡፡ በመሆኑም የቤተ ክርስቲያናችንን ዘመን ተሻጋሪና ብሔራዊ አስተዋጽኦ ሳይሸራረፍና ሳይዛነፍ የማስቀጠል ሓላፊነት ያለበት ቤተ ክህነታችን ያነሣነው ርእሰ ጉዳይ ወደ ትክክለኛው መስመር እንዲገባና ሌሎች ስሕተቶችም እንዲቀንሱ፡-
     
    ሀ. ቤተ ክርስቲያኒቱ ያላትን ሀብት መርምሮ ቢያጣራ
     
    የግእዝ ሥነ ጽሑፍ ሀብት በቁጥሩም ይሁን በይዘቱ ሰፊና ጥልቅ ነው፡፡ ይህን ለማረጋገጥ በዘርፉ የተካሔዱ ጥናቶችን ከማየት ባሻገር፤ ሀብቱን ለዘመናት ይዘው ያቆዩ ገዳማትንና አድባራትን ዕቃ ቤቶች መጐብኘት ይበቃል፡፡ ይህ የሥነ ጽሑፍ ሀብት ለዘመናት ወደ ግእዝ ቋት የገባበትን ሒደት ስንመለከት፤ በየጊዜው በቤተ ክርስቲያኗ ትምህርተ ሃይማኖት፣ ሥርዐተ እምነትና ታሪክ እንዲሁም ትውፊት ሚዛንነት እየተመዘነ አልነበረም ማለት የሚያስችሉ ጉዳዮች አሉ፡፡ በሥነ ጽሑፍ ውስጥ የሊቃውንት የግል ፍልስፍናና ዐቋሞች፣ የገልባጮች /copysts/ “ማብራሪያዎች” /explanations/ እና ተጨማሪ አሳቦች /additions/ እንዲሁም “ክለሳዎች” /revisions/ ይገኛሉ፡፡ በግል የሚደረጉ ኩሸቶች ደግሞ ብዙኃኑን ወይም ትልቁን ሥዕል ላይገልጹ ወይም ላይወክሉ ይችላሉ፡፡ አልፎ አልፎም ከቤተ ክርስቲያኗ አስተምህሮ በአንጻር የሚቆሙ ሐተታዎችም ይገኛሉ፡፡ እነዚህ ሥነ ጽሑፎች ከመንፈሳዊ ውጭ ለሚደረግ ጥናትና ምርምር ጠቀሜታቸው የጐላ ቢሆንም ቤተ ክርስቲያኗን ግን አይወክሉም፡፡

     

    በቅዱሳን የገድል መጻሕፍትም ላይ ቢሆን ገልባጩ /ሁለተኛው ጸሐፊው/ በማወቅም ይሁን በስሕተት የሚጨምራቸው የግል ሐተታዎች ሊኖሩ ይችላሉ፡፡ በአጠቃላይ በሰፊው ምርት ላይ እንክርዳድ እንደማይጠፋ ሁሉ በትልቁ የሥነ ጽሑፍ ሀብታችንም ላይ በማወቅም ባለማወቅም ተዘርተው የበቀሉ እንክርዳዶች አይጠፉም፡፡ ይህ ደግሞ በየትኛውም የሥነ ጽሑፍ ሀብት ባላቸው ሀገራት የነበረና የሚኖር ነው፡፡ ምናልባት እኛን ከሌሎች ልዩ የሚያደርገን፤ ይህ ችግር በሥነ ጽሑፍ አዝመራችን ሊኖር እንደሚችል በማመን የማጣራት ሥራ ካለመሥራታችን ላይ ነው፡፡

     

    ከ300 በላይ የልዩ ልዩ ቅዱሳንና ቅዱሳት ገድላት እንዳሉን መረጃዎች ያመለክታሉ፡፡ በተመሳሳይም በርካታ የነገረ ሃይማኖትና ሥርዐተ እምነት መጻሕፍትም አሉን፡፡ እነዚህ ሁሉ በግእዝ ልሳናችን ተጽፈው የቆዩን ናቸው፡፡ ታድያ በየዘርፉ ተጽፈውና በየዘመናቱ እየተባዙ /እየተገለበጡ/ የቆዩንን እነዚህን ሥነ ጽሑፎች መርምሮ ፍሬውን ከገለባ በመለየት ቤተ ክርስቲያኗን የሚገልጹትን ቅጂዎች በቀኖና ማሳወቅ ከቤተ ክህነታችን የሚጠበቅ አንገብጋቢ ተግባር ነው፡፡
     
    ለ. ለጥናትና ምርምር ማዘጋጀት
     
    ዕውቀትን ከቅድስና ጋር የያዙ አባቶቻችን አንጀታቸውን አጥፈው፤ ብራና ፍቀውና አለስልሰው፤ ቀለም በጥብጠው፣ ብዕር ቀርጸው ጀርባቸውን አጐብጠው ጽፈውልን ያለፉት ትውልድ እንዲማርባቸው ነው እንጂ በየዕቃ ቤቱ ታፍነው በምስጥ እንዲበሉ፣ በእሳት እንዲቃጠሉ እንዲሁም በሌሎች ተፈጥሮአዊ አደጋዎች እንዲወድሙ አይደለም፡፡ ዛሬ በየዕቃ ቤቱ የሚገኙትን መጻሕፍት የሚጐበኝ አካል ሳያዝን አይወጣም፡፡ ምንም ያህል ጥረት ቢደረግ ዳግም ሊገኙ የማይችሉ፣ የዕውቀት ምንጭ የሆኑ የብራና መጻሕፍት እንደተቀበሩ ይጠፋሉ፤ ይህ መሆን የለበትም፡፡ ቤተ ክርስቲያን ባለሞያዎችን አሰማርታ መጻሕፍት ባሉበት እንዲጠበቁ ማድረግ ይገባታል፡፡ ለጥናትና ምርምር እንዲውሉም በልዩ ልዩ መንገድ ገልብጦ ማእከላዊ በሆነ ቦታ ማስቀመጥ ይጠበቅባታል፡፡
     
    ሐ. መጻሕፍቱን ቀድሞ መተርጐ ምና መተንተን
     
    ዛሬ ይህንን ጽሑፍ እንድንጽፍ ያነሣሣን የወ/ሪት ዌንዲ የተሳሳተና ዕውቀት የጐደለው ትርጉምና ሐተታ ነው፡፡ ወ/ሪት ዌንዲ አጣማ የተረጐመችው መጽሐፍ ቀድሞ በራሳችን ሊቃውንት መልቶና ሰፍቶ ቢተረጐም ኖሮ የወ/ሪት ዌንዲ ስሕተት አይፈጠርም ነበር፡፡ በመሆኑም የግእዝ መጻሕፍትና ሊቃውንት ባለቤት የሆነችው ቤተ ክርስቲያን ቅዱሳት መጻሕፍቱን ከበቂ ማብራሪያና ትንተና ጋር እንግሊዝኛንና አማርኛን ጨምሮ ወደ ልዩ ልዩ ቋንቋዎች እየተረጐመች ለተጠቃሚዎች ብታደርስ ቢያንስ ወደፊት ሊፈጠሩ የሚችሉ ስሕተቶችን መቀነስ ይቻላል፡፡
     
    2. ሊቃውንተ ቤተ ክርስቲያን
     
    በቀደሙት አበው ተጽፈው ትውልድን በመሻገር ለእኛ የደረሱንን መጻሕፍት የመጠበቅና የማስጠበቅ እንዲሁም የመተርጐምና የማብራራት ቀዳሚ ሓላፊ ነት የሚወድቀው በሊቀውንተ ቤተ ክርስቲያን ላይ ነው፡፡ በመሆኑም የአበውን ወንበር ተረክበው የሚያስተምሩ ሊቃውንት ቅዱሳት መጻሕፍትን የመመርመሩንና የማስተካከሉን ሥራ አጠናክረው ቢቀጥሉ አላዋቂዎች የሚያ ደርሱትን ጥፋት መቀነስ ይቻላል፡፡ እንደ ወይዘሪት ዌንድ ዓይነት የአላዋቂ ትርጉም ሲከሠትም ፈጥነው በተገኘው መንገድ ሁሉ መልስ መስጠት ይጠበቅባቸዋል፡፡

     

    ትውልዱ የአባቶቹን ዕውቀት ይፈልጋል፡፡ ነገር ግን በቀጥታ እንዳያገኘው የቋንቋ አለማወቅ አጥር ይሆንበታል፡፡ በመሆኑም የዛሬዎቹ ሊቃውንተ ቤተ ክርስቲያን ትውልዱን በሚማርከው መልኩ ቋንቋውን ሊያስተምሩትና የቋንቋውን ገደል አሻግረው ወደ አባቶቹ የዕውቀት አዝመራ ሊያደርሱት ይገባል፡፡ ከዚህ ጐን ለጐን ተግቶ ለመማር ለማይችለው መጻሕፍቱን ወደሚያውቀው ቋንቋ በመመለስ ዕውቀትን የማሸጋገር ሥራ ቢሠሩ ወጣቱ በሚያውቀው የአፍርንጅ ቋንቋ ስሕተት የሚፈጽሙ እንደ ዌንዲ ዓይነቶቹን ተከራክሮ መርታትና ማሳመን ይችላል፡፡
     
    3. ምእመናን
     
    ምእመናን እንደ ሰሞኑ ያሉ ድፍረቶች በቅዱሳን ላይ ሲነገር ሲሰሙ ሊደናገጡ አይገባም፡፡ ይልቁንም ቅዱሳን አባቶችና እናቶች ስለተጠሩበት መንፈሳዊ ሕይወት ሲሉ ራሳቸውን ለሰማዕ ትነት አሳልፈው እየሰጡ እምነታቸውን በተግባር ገልጸው እንዳለፉ መገንዘብ ይገባቸዋል፡፡ በመሆኑም ሳይደናገጡ ከቅዱሳን አባቶቻችንና እናቶቻችን ጋር ያላቸውን የጸሎት ግንኙነት ሊያጠናክሩ ይገባል፡፡ ከዚህ በተጨማሪ ወጣቶች ጥያቄ ሲፈጠርባቸው ወደ ሊቃውንት አባቶቻቸው በመቅረብ ትክክለኛውን ሊረዱና ሊይዙ ይገባል፡፡ ቅዱሳንን የመረጠ፤ መርጦም በተጋድሎ ያጸናቸውና የድል አክሊልም ያቀዳጃቸው አምላከ ቅዱሳን ቤተ ክርስቲያንን ከከሳሾችና ከወቃሾች ይጠብቅልን፤ እኛንም በመንፈሳዊ ቅንዓት ቀስቅሶ በቅዱሳን ላይ የስድብ አፋቸውን ለሚከፍቱ ተገቢ መልስ ለመስጠትና በእምነታችን ለመጽናናት ያብቃን አሜን፡፡

    ወስብሐት ለእግዚአብሔር

    ምንጭ፡- ስምዐ ጽድቅ ዘኦርቶዶክስ ተዋሕዶ ከታኅሣሥ 1-15 ቀን 2007 ዓ.ም.

    Read more »

  • ምኩራብ(የዐቢይ ጾም ሦስተኛ ሳምንት)

    ምኩራብ(የዐቢይ ጾም ሦስተኛ ሳምንት) 

    የዕለተ ሰንበት መዝሙር (ከጾመ ድጓ)

    ቦአ ኢየሱስ ምኩራበ አይሁድ ወመሐረ ቃለ ሃይማኖት ወይቤሎሙ ምጽዋተ አበድር እመሥዋዕት አነ ውእቱ እግዚኣ ለሰንበት ወአቡሃ ለምሕረት እግዚኣ ውእቱ ለሰንበት ወልደ እጓለ እመሕያው ኢትግበሩ ቤተ አቡየ ቤተ ምስያጥ ቤትየሰ ቤተ ጸሎት ይሰመይ ቦአ ምኩራቦሙ ወገሠፆሙ ያርምሙ አንከሩ ምህሮቶ ሞገስ ቃሉ ወጣዕመ ነገሩ ወሣዕሣዓ አፉሁ፡፡

    ትርጉም: ጌታችን ኢየሱስ ወደ አይሁድ ምኩራብ ገባ፤ የሃይማኖት ቃልን አስተማረ፤ ከመሥዋዕት ይልቅ ምሕረትን እወዳለሁ፤የሰንበት ጌታዋ የምሕረት አባቷም እኔ ነኝ፤ የሰው ልጅም የሰንበት ጌታዋ ነው ፡፡ያባቴን ቤት የንግድ ቦታ አታድርጉት፤ቤቴስ የጸሎት ቤት ይባላል (እያለ የሃይማኖትን ቃል አስተማራቸው፡)፡ ወደ ምኩራባቸውም ገብቶ ዝም ይሉ ዘንድ ገሠፃቸው፤ እነርሱም ትምህርቱን፣ የቃሉን ግርማ፣ የአነጋገሩን ጣዕምና፣ የአንደበቱን ቅልጥፍና አደነቁ።

    ምንባባት (መልዕክታት)

    (ቆላ. 2÷16-ፍጻ.) 
    እንግዲህ በመብልም ቢሆን÷ በመጠጥም ቢሆን÷ በልዩ ልዩ በዓላትም ቢሆን÷ በመባቻም ቢሆን÷ በሰንበትም ቢሆን የሚነቅፋችሁ እንዳይኖር ተጠንቀቁ፡፡ ይህ ሁሉ ይመጣ ዘንድ ላለው ጥላ ነውና። አካሉ ግን የክርስቶስ ነው፡፡ በመታለልና ራስን ዝቅ በማድረግ ለመላእክት አምልኮ ትታዘዙ ዘንድ ወድዶ÷ በአላየውም በከንቱ የሥጋው ምክር እየተመካ የሚያሰንፋችሁ አይኑር፡፡ ሥጋ ሁሉ ጸንቶ በሚኖርበት÷ በሥርና በጅማትም በሚስማማበት÷ በእግዚአብሔርም በሚያድግበትና በሚጸናበት በሚሞላበትም በራስ አይጸናም፡፡ ከዚህ ዓለም ኑሮ ከክርሰቶስ ጋር ከሞታችሁ እንደገና በዓለም እንደሚኖሩ ሰዎች እንዴት ትሠራላችሁ? እንዴትስ ይህን አትዳስስ÷ ይህን አትንካ÷ ይህንም አትቅመስ ይሉአችኋል? ይህ ሁሉ እንደ ሰው ትእዛዝና ትምህርት ለጥፋት ነውና፡፡ ይህም ስለ ልብ ትሕትናና እግዚአብሔርንም ስለ መፍራት÷ ለሥጋም ስለ አለማዘን ጥበብን ይመስላል፤ ነገር ግን ከሥጋ በላይ ነው እንጂ ምንም ክብር የለውም፡፡ 

    (ያዕ. 2÷14-ፍጻ.) 
    ወንድሞቻችን ሆይ÷ እምነት አለኝ፤ ምግባር ግን የለኝም የሚል ሰው ቢኖር÷ ምን ይጠቅመዋል? በውኑ እምነቱ ልታድነው ትችላለችን? ከወንድሞቻችን÷ ወይም ከእኅቶቻችን÷ የታረዙ ወይም የዕለት ምግብ ያጡ ቢኖሩ÷ ከእናንተም አንዱ÷ “በሰላም ሂዱ÷ እሳት ሙቁ÷ ትጠግባላችሁም” ቢላቸው÷ ለችግራቸውም የሚሹትን ባይሰጣቸው ምን ይጠቅማቸዋል? እንዲሁም ሥራ የሌለው እምነት ቢኖር በራሱ የሞተ ነው፡፡ነገር ግን አንድ ሰው÷ “አንተ እምነት አለህ÷ እኔም መልካም ሥራ አለኝ፤ እስቲ ሃይማኖትህን ከሥራህ ለይተህ አሳየኝ፤ እኔም እምነቴን በሥራዬ አሳይሃለሁ” ይላል፡፡ አንተም እግዚአብሔር አንድ እንደ ሆነ ታምናለህ፤ መልካምም ታደርጋለህ፤ እንዲህስ አጋንንትም ያምናሉ፤ ይንቀጠቀጣሉም፡፡ አንተ ሰነፍ ሰው÷ እምነት ያለ ምግባር የሞተች እንደ ሆነች ልታውቅ ትወዳለህን? አባታችን አብርሃም ልጁን ይስሐቅን ወደ መሠዊያው ባቀረበው ጊዜ÷ በሥራው የጸደቀ አይደለምን? እምነት ለሥራ ትረዳው እንደ ነበር÷ በሥራውም እምነቱ እንደ መላችና ፍጽምት እንደ ሆነችም ታያለህን? መጽሐፍ÷ “አብርሃም በእግዚአብሔር አመነ፤ ጽድቅ ሆኖም ተቈጠረለት” የሚለው ተፈጸመ፤ የእግዚአብሔርም ወዳጅ ተባለ፡፡ ሰው በሥራ እንደሚጸድቅ በእምነት ብቻም እንዳይደለ ታያለህን? እንዲሁ ዘማይቱ ረአብ ደግሞ ጒበኞችን ተቀብላ÷ በሌላ መንገድ ባወጣቻቸው ጊዜ በሥራ አልጸደቀችምን? ከነፍስ የተለየ ሥጋ የሞተ እንደ ሆነ÷ እንዲሁ ደግሞ ከሥራ የተለየ እምነት የሞተ ነው፡፡ 

    (የሐዋ.10÷1-8) 
    በቂሳርያም ቆርኔሌዎስ የሚባል አንድ ሰው ነበር፤ ኢጣሊቄ ለሚሉት ጭፍራም የመቶ አለቃ ነበር፡፡ እርሱም ጻድቅና ከነቤተሰቡ እግዚአብሔርን የሚፈራ ነበር፤ ለሕዝቡም ብዙ ምጽዋት ይሰጥ ነበር፤ ዘወትርም ወደ እግዚአብሔር ይጸልይ ነበር፡፡ የእግዚአብሔር መልአክም በራእይ ከቀኑ በዘጠኝ ሰዓት በግልጥ ታየው፤ ወደ እርሱም ገብቶ÷ “ቆርኔሌዎስ ሆይ÷” አለው፡፡ ወደ እርሱም ተመልክቶ ፈራና÷ “አቤቱ÷ ምንድን ነው?” አለ፤ መልአኩም እንዲህ አለው÷ “ጸሎትህም ምጽዋትህም መልካም መታሰቢያ ሆኖ ወደ እግዚአብሔር ዐርጎአል፡፡ አሁንም ጴጥሮስ የሚባለውን ስምዖንን ይጠሩልህ ዘንድ ወደ ኢዮጴ ከተማ ሰዎችን ላክ፡፡ እርሱም ቤቱ በባሕር አጠገብ ባለው በቊርበት ፋቂው በስምዖን ቤት እንግድነት ተቀምጦአል፡፡ ልታደርገው የሚገባህን እርሱ ይነግርሃል፡፡” ያነጋገረውም መልአክ ከሄደ በኋላ ከሎሌዎቹ ሁለት÷ ከማይለዩት ጭፍሮቹም አንድ ደግ ወታደር ጠራ፡፡ 

    ምስባክ 
    መዝ 68፡9
    እስመ ቅንዐተ ቤትከ በልዐኒ
    ትዕይርቶሙ ለእለ ይትዔየሩከ ወድቀ ላዕሌየ
    ወቀጻዕክዋ በጾም ለነፍስየ፡፡

    ትርጉም፦
    የቤትህ ቅንዓት በልታኛለችና
    የሚሰድቡህም ስድብ በላዬ ወድቆአልና
    ነፍሴን በጾም አስመረርሁአት፡፡ 

    ወንጌል(ዮሐ. 2÷12-ፍጻ. ) 
    ከዚህም በኋላ እርሱና እናቱ÷ ወንድሞቹና ደቀ መዛሙርቱም ወደ ቅፍርናሆም ወረዱ፤ በዚያም ብዙ ያይደለ ጥቂት ቀን ተቀመጡ፡፡ የአይሁድም የፋሲካቸው በዓል ቀርቦ ነበር፤ ጌታችን ኢየሱስም ወደ ኢየሩሳሌም ወጣ፡፡ በቤተ መቅደስም በሬዎችንና በጎችን÷ ርግቦችንም የሚሸጡትን÷ገንዘብ ለዋጮችንም ተቀምጠው አገኘ፡፡ የገመድም ጅራፍ አበጀ፤ በጎችንና በሬዎችን÷ ሁሉንም ከቤተ መቅደስ አስወጣ፤ የለዋጮችንም ገንዘብ በተነ፤ ገበታዎቻቸውንም ገለበጠ፡፡ ርግብ ሻጮችንም÷ “ይህን ከዚህ አውጡ፤ የአባቴን ቤት የንግድ ቤት አታድርጉ” አላቸው፡፡ ደቀ መዛሙርቱም÷ “የቤትህ ቅናት በላኝ” የሚል ቃል ተጽፎ እንዳለ ዐሰቡ፡፡ 
    አይሁድም መልሰው÷ “ይህን የምታደርግ ምን ምልክት ታሳያለህ?” አሉት፡፡ ጌታችን ኢየሱስም÷ “ይህን ቤተ መቅደስ አፍርሱት፤ በሦስተኛውም ቀን አነሣዋለሁ” ብሎ መለሰላቸው፡፡ አይሁድም÷ “ይህ ቤተ መቅደስ በአርባ ስድስት ዓመት ተሠራ፤ አንተስ በሦስት ቀኖች ውስጥ ታነሣዋለህን?” አሉት፡፡ እርሱ ግን ይህን የተናገረው ቤተ መቅደስ ስለ ተባለ ሰውነቱ ነበር፡፡ ከሙታን በተነሣ ጊዜም ደቀ መዛሙርቱ ስለዚህ እንደ ነገራቸው ዐሰቡ፤ በመጻሕፍት ቃልና ጌታችን ኢየሱስ በነገራቸውም ነገር አመኑ፡፡ ጌታችን ኢየሱስም በፋሲካ በዓል በኢየሩሳለም ሳለ ብዙ ሰዎች ያደረገውን ተአምራት ባዩ ጊዜ በስሙ አመኑ፡፡ እርሱ ጌታችን ኢየሱስ ግን አያምናቸውም ነበር፤ ሁሉን እያንዳንዱን ያውቀዋልና፡፡ የሰውንም ግብሩን ሊነግሩት አይሻም፤ እርሱ በሰው ያለውን ያውቅ ነበርና፡፡

    Read more »

  • ዐቢይ ጾም

    ይህ ጾም የተለያዩ ስሞች አሉት፡፡
    1. ዓቢይ ጾም ይባላል፡- ጌታ ከተጠመቀ በኋላ የጾመው የዓርባ ቀን ጾም በመሆኑ እንዲሁም ዓቢይ እግዚአብሔር ወብዙኃ አኮቴቱ ዓቢይ እግዚአብሔር ወዓቢይ ኃይሉ የተባለ ጌታ የጾመው ስለሆነ መዝ. 47፡1፣ መዝ. 146፡5 ፡፡

    2. ሁዳዴ ጾም ይባላል፡- ሁዳድ ማለት ሰፊ የመንግሥት እርሻ ወይም ማንኛውም የሕዝብ ብዛት ያለበት ሥራ ሁሉ ሁዳዴ የሚባል ሲሆን፤ የሁዳዴ ጾም የተባለውም በጾም ቀናት 55 ቀናት ስለሚጾምና ጾሙንም ጌታችን መድኃኒታችን ኢየሱስ ክርስቶስ ስለጾመው ነው፡፡አሞ. 7፡1

    3. በዓተ ጾም ይባላል፡- ይህም ማለት የጾም መግቢያ፣ መባቻ ወይም ጾሙ የሚሰፍርበት በዓት ማለት ነው፡፡

    4. ጾመ አርባ ይባላል፡- ጌታችን መድኃኒታችን ኢየሱስ ክርስቶስ ዓርባ ቀን ስለ ጾመው ነው፡፡ ማቴ. 4፤1

    5. ጾመ ኢየሱስ ይባላል፡- ይህም ራሱ ኢየሱስ ክርስቶስ ጾሞ ጹሙ ብሎ ስላዘዘን

    6. ጾመ ሙሴ ይባላል፡- ይህ ደግሞ ቅዱስ ያሬድ በዘወረደ ሰኞ ዕዝል ከመዝ ይቤ ሙሴ . . . ሙሴኒ ይቤ በውስተ ኦሪት . . . እያለ በጾመ ድጓው ስለ ዘመረ ነው፡፡

    ዓቢይ ጾም መሠረቱ ጌታችን የጾመው 40 ቀን ሆኖ ከመነሻው በፊት አንድ ሳምንትና ከመጨረሻው በኋላ ደግሞ አንድ ሣምንት ታክሎበት /ተጨምሮበት/ 55 ቀኖች የምንጾመው ጾም ዓቢይ ጾም ይባላል፡፡ የመጀመሪያው አንድ ሳምንት የዝግጅትና የመለማመጃ ጊዜ ሲሆን፣ የመጨረሻው አንድ ሳምንት ደግሞ የጌታችን ሕማማት ሳምንት ለማስታወስ ነው፡፡ በሌላ በኩል የመጀመሪያው ሳምንት ሕርቃል ከተባለ ንጉሥ ጋር በማያያዝ ጾመ ሕርቃል የሚባል ስም መሰጠቱ የተለመደ ነው፡፡

    ጾም፡- ጾመ፤ ጦመ፤ እህል ውሃ ሳይቀምስ ዋለ፤ ከሥጋ ከቅቤ ተከለከለ ማለት ነው፡፡ በብሉይ ኪዳን ጾም ከፍተኛ ቦታ ያለው ሲሆን፤ የብሉይ ኪዳን ነቢያት ከእግዚአብሔር ጋር በሚገናኙበት ወራት እህልና ውኃ በአፋቸው አይገባም ነበር፡፡ /ዘጸ. 34፤28/ በኃጢአት ብዛት የታዘዘው የእግዚአብሔር መዓት የሚመለሰው ሕዝቡ በጾም ሲለምኑትና ሲማልዱት ነበር፡፡ ዮናስ 2፤7-10

    በሐዲስ ኪዳንም ጾም ሰው ሠራሽ ሕግ ሳይሆን ጌታችን መድኃኒታችን ኢየሱስ ክርስቶስ የሥራው መጀመሪያ አድርጎ የሠራው ሕግ ነው፡፡ /ማቴ. 4፤2፣ ሉቃ. 4፤2/ ይህም ብቻ ሳይሆን በቁራኝነት አብሮ የሚኖር መንፈስ ርኩስ ሰይጣን፤ በጾም የሚወገድ መሆኑን መድኃኒታችን ኢየሱስ ክርስቶስ ተናግሯል፡፡ /ማቴ.17፡21፣ ማር. 9፡2 ቤተ ክርስቲያንን እንዲያገለግሉ የታዘዙ ሐዋርያትም በየጊዜው ከመንፈስ ቅዱስ ትእዛዝ የሚቀበሉት በጾም እና በጸሎት ላይ እንዳሉ ነበር፡፡ /ሐዋ.ሥራ 13፤2/ ለስብከተ ወንጌል የሚያገለግሉ ዲያቆናትና ቀሳውስትም የሚሾሙት በጾምና በጸሎት ነበር፡፡ /የሐዋ. ሥራ 13፤3፣ 14፤23/ እነ ቆርኔሌዎስ ያላሰቡትን ያዩና ያገኙ የነበረው በጾምና በጸሎት ፈጣሪያቸውን ለምነው ነው፡፡

    በጾም ወራት ላምሮት፣ ለቅንጦት የሚበሉ ወይም ለመንፈሳዊ ኃይል ተቃራኒ የሆኑ፤ ሥጋዊ ፍትወትን የሚያበረታቱ ሥጋና የሚያሰክሩ መጠጦችን /ዳን. 10፤2-3/ ቅቤና ወተት /መዝ. 108፤24/ ማራቅ እንዳለብን ታዝዟል፡፡ ባልና ሚስት በጦም ወራት በአልጋ አይገናኙም፡፡ /1ኛ ቆሮ. 7፤5፣ 2ኛ ቆሮ. 6፤6/ በጾም ወራት ከመባልዕት መከልከል ብቻ ሳይሆን ዓይን ክፉ ከማየት፣ አንደበት ክፉ ከመናገር፤ ጆሮ ክፉ ከመስማት መቆጠብ እንደሚገባ ቅዱስ ያሬድ በጾመ ድጓው፤ ይጹም ዓይን፣ ይጹም ልሳን፣ እዝንኒ ይጹም እምሰሚዐ ሕሡም በተፋቅሮ ሲል ይገልጽልናል /ያስረዳናል፡፡/

    ዐቢይ ጾምን በተመለከተ ቀደም ሲል ወንጌላውያን የጻፉትን የጌታችን ጾም እንደሚከተለው እናያለን፡፡ /ማቴ. 4፡1-11፣ ሉቃ. 4፡1-13/ ኪዘያ ወዲያ ኢየሱስ ከዲያብሎስ ይፈተን ዘንድ መንፈስ ወደ ምድረ በዳ ወሰደው፡፡ አርባ ቀንና አርባ ሌሊትም ከጦመ በኋላ ተራበ፡፡ ከተጠመቀ በኋላ መሄዱ እናንተም ተጠምቃችሁ ሳትውሉ ሳታድሩ ዕለቱን ጽኑ ሥራ ሥሩ፣ ለገድል ለትሩፋት ተዘጋጁ በማለት ለአብነት ለማስተማር ዕለቱን ሂዷል፡፡ ወደ ገዳም መሄዱም በብቸኝነት ባለበት በገነት አዳም ድል ተነስቶ ነበርና እርሱም በብቸኝነት ገዳም ውስጥ ተገኝቶ ዲያብሎስን ድልን ለመንሳት ነው፡፡ /ማቴ. 12፤29/

    ዘወረደ፡- 
    የዓቢይ ጾም መግቢያ የሆነው የሰኞ ዋዜማ እሁድና ከእርሱ ጋር ተያይዞ ያለው የሚቀጥለው ሳምንት “ዘወረደ” ይባላል፡፡ ዘወረደ የተባለው ጌታችን መድኃኒታችን ኢየሱስ ክርስቶስ ከሰማይ መውረዱን የሚያመለክተው የእግዚአብሔር ቃል የሚነገርበት ስለሆነ ነው፡፡

    ያ በሰማያት የሚኖረው በእሳትና መብረቅ፣ በከባድ ደመናና ነጎድጓድ፣ በበረታ የቀንደ መለከትም ድምፅ ወደ ምድር የወረደውና በሙሴ መሪነት በምድረ በዳ ለሚጓዙት ለእስራኤል ልጆች በሲና ተራራ የተገለጠው እግዚአብሔር ብለን የምንጠራው ፈጣሪና የማይታየው አምላክ በመጨረሻ ዘመን በቅድስት ድንግል ማርያም ማኅፀን ሰው ሆኖና በበረት ተወልዶ፣ የመስቀል መከራን ተቀብሎና ሞቶ ተቀብሮና ተነስቶ ፍጥረተ ዓለሙን ከዲያብሎስ አገዛዝ ከኃጢአት ቀንበርና ከሞት ፍዳ ሊያድን ከሰማየ ሰማያት ወረደ ማለት ነው፡፡

    እንዲሁም ሙሴ በኢየሱስ ክርስቶስና በድንግል ማርያም ምሳሌ ከእግዚአብሔር የተሰጡትን ቃላት፣ ትእዛዛትና / ጽላት/ ይዞ ከሲና ተራራ ወደ እስራኤል ሕዝብ የመውረዱን ዝክረ ነገር ለማስታወስ ዘወረደ ተባለ፡፡

    አምላክ አዳምን ለማዳን ከሰማይ መውረዱን፣ ከድንግል ማርያም መወለዱንና በመስቀል መስቀሉን ስለሚያወሳ ነው፡፡ /ዘፀ. 3፤9፣ ዮሐ. 3፤11/ ሙሴኒም ይሉታል፡፡ ስለ ሙሴ ሕግና ጾም ሙሴን እየደጋገመ ስለሚያነሳ ነው፡፡ 
    በዚህም መሠረት የዓቢይ ጾም የመጀመሪያው ሳምንት ዘወረደ ተባለ፡፡

    ጾመ ሕርቃል፡-
    ይህ ሳምንት በሕርቃል ስም የተጠራበት ምክንያት በ714 ዓ.ም ሕርቃል የኤራቅሊዮስ/ የቤዛይንታን ንጉሥ በነበረበት ዘመን፤ ፋርሶች ኢየሩሳሌምን ወርረው የጌታችንን መስቀል ማርከው ወስደው ነበር፡፡ እርሱ ወደ ፋርስ ዘምቶ መስቀሉን ከእነርሱ ነጥቆ ይዞ ወደ ኢየሩሳሌም ተመልሷል፡፡

     ከመዋጋቱ በፊት ሐዋርያት በሲኖዶሳቸው ነፍስ የገደለ ሰው እስከ እድሜ ልኩ ይጹም ብለው ሥርዓት ሠርተው ነበርና እርሱም ጾሙን ፈርቶ ነበርና በኢየሩሳሌም የነበሩ ምዕመናን ይህን ሀሳብ ደግፈው የአንድ ሰው እድሜ ቢበዛ ሰባ ሰማንያ ነው፡፡ ጠላታችንን አጥፋልን እንጂ ጾሙን እኛ ተከፋፍለን እንጾማለን ባሉት መሠረት አምስት አምስት ቀን ተከፋፍለው ጹመውለታል፡፡ ያላወቁት አንድ ጊዜ ጹመው ትተውታል፡፡ ያወቁት ግን ቀድሞም ሐዋርያት ጹመውታል ብለው ሥርዓት አድርግው በዓመት በዓብይ ጾም መጀመሪያ ላይ የሚጾሙት ሆነዋል፡፡ ይህንን መሠረት በማድረግ ቅድስት ቤተ ክርስቲያናችን ከጌታችን ከመድኃኒታችን ኢየሱስ ክርስቶስ ጾም የመጀመሪያውን ሳምንት ጾመ ሕርቃል በሚል ስያሜ ሰይማ እንዲጾም አድርጋዋለች፡፡

    Read more »

  • ገብር ኄር (የዐቢይ ጾም 6ኛ ሳምንት)

    መኑ ውእቱ ገብር ኄር ወምእመን ዘይረክቦ እግዚኡ በምግባረ ሠናይ ወይሠይሞ ዲበ ኲሉ ንዋዩ ካዕበ ይቤሎ እግዚአብሔር ገብር ኄር ወምእመን ዘበውኁድ ምእመነ ኮንከ ዲበ ብዙኅ እሠይመከ ባእ ውስተ ፍሥሐሁ ለእግዚእከ፡፡

    ትርጉም: ጌታው በመልካም ሥራ የሚያገኘው በሐብቱ ኹሉ ላይ የሚሾመው፤የታመነ በጎ አገልጋይ ማን ነው? ዳግመኛም እግዚአብሔር አንተ የታመንክ በጎ አገልጋይ በጥቂቱ የታመንህ ስለኾንህ በብዙ እሾምሃለሁ ወደ ጌታህ ደስታ ግባ ይለዋል፡፡

    መልዕክታት
    2ኛ ጢሞ.2÷1-15 ልጄ ሆይ÷ አንተም በጌታችን በኢየሱስ ክርስቶስ ጸጋ በርታ፡፡ በብዙ ምስክሮች ፊት ከእኔ የሰማኸውን ትምህርት ለሌሎች ሊያስተምሩ ለሚችሉ ለታመኑ ሰዎች እርሱን አስተምራቸው፡፡ ኢየሱስ ክርስቶስን እንደሚያገለግል በጎ አርበኛ ሆነህ መከራ ተቀበል፡፡ 

    1ኛ ጴጥ.5÷1-11 እንግዲህ እኔ ከእነርሱ ጋር ሽማግሌ÷ የክርስቶስም መከራ ምስክር÷ ደግሞም ሊገለጥ ካለው ክብር ተካፋይ የሆንሁ በመካከላቸው ያሉትን ሽማግለዎችን እማልዳቸዋለሁ፡፡ በእናንተ ዘንድ ያሉትን የእግዚአብሔርን መንጋዎች ጠብቁ፤ ስትጠብቁአቸውም እንደ እግዚአብሔር ፈቃድ በውድ እንጂ በግድ አይሁን፤ በበጎ ፈቃድ እንጂ መጥፎውን ረብ በመመኘትም አይሁን፡፡

    ግብረ ሐዋርያት
    የሐዋ.1÷6-8 እነርሱም ተሰብስበው ሳሉ÷ "ጌታ ሆይ÷ በዚህ ወራት ለእስራኤል ልጆች መንግሥትን ትመልሳለህን?” ብለው ጠየቁት፡፡ እርሱም መልሶ እንዲህ አላቸው÷ “አብ በገዛ ሥልጣኑ የወሰነውን ቀኑንና ዘመኑን ልታውቁ አልተፈቀደላችሁም፡፡ነገር ግን መንፈስ ቅዱስ በእናንተ ላይ በወረደ ጊዜ ኅይልን ትቀበላላችሁ፤በኢየሩሳሌምና በይሁዳ ሁሉ፣በሰማሪያና እስከ ምድር ዳርቻ ድረስም ምስክሮቸ ትሆኑኛላችሁ።"
    ምስባክ
     መዝ. 39÷8 "ከመ እንግር ፈቃደከ መከርኩ አምላኪየ፡፡ ወሕግከኒ በማዕከለ ከርሥየ፡፡ ዜኖኩ ጽድቀከ በማኅበር ዐቢይ፡፡"
     ትርጉም፦ አምላኬ ሆይ፥ ፈቃድህን ለማድረግ መከርሁ፥ ሕግህም በልቤ ውስጥ ነው። በታላቅ ጉባኤ ጽድቅህን አወራ
    ወንጌል
    ማቴ. 25÷14-30 “መንገድ እንደሚሄድ÷ አገልጋዮቹንም ጠርቶ ሊያተርፉበት ገንዘቡን እንደ ሰጣቸው ሰው እንዲሁ ይሆናልና፤ ለእያንዳንዱ እንደ ችሎታው ለአንዱ አምስት÷ ለአንዱ ሁለት÷ ለአንዱም አንድ ሰጠና ወዲያውኑ ሄደ፡፡ 
    ቅዳሴ
    ዘባስልዮስ

    ምንጭ፤ ማሕበረ ቅዱሳን 

    Read more »

RSS